"ნეიტრალური ტონალობის თანამედროვე ბინა.

Pastels ჩვენ მიერ შექმნილი, თანამედროვე სტილის ინტერიერია. ბინის მაცხოვრებლები ახალგაზრდა წყვილი და ორი ბავშვი არიან, რომლებსაც მყუდრო, ნათელი და კომფორტული სახლი სურდათ.
გადავწყვიტეთ, ოჯახის სურვილების გათვალისწინებით, ბინაში მაქსიმალურად ჰარმონიული ატმოსფერო შეგვექმნა. თუმცა, გეგმარებიდან გამომდინარე, გარკვეულ სირთულეებთან გამკლავება მოგვიწია — ვიტრაჟის განლაგება ბუნებრივი სინათლის შემოსვლას ხელს უშლიდა. დაბალი რიგელები კი, მზის შუქს კიდევ უფრო ახშობდა. ამის საპასუხოდ, სივრცეს ნაზი და მსუბუქი, პასტელური ფერების პალიტრა შევურჩიეთ, რამაც ბინას ნათელი და ჰარმონიული იერსახე შესძინა. რიგელების მძიმე ვიზუალი საერთო ესთეტიკასაც არღვევდა, თუმცა, ამ პრობლემასაც საინტერესო გადაწყვეტა მოვუძებნეთ და რიგელები დეკორატიული თაროების შეუმჩეველ ნაწილად ვაქციეთ.

ავეჯის დეტალებზე ჭარბობს ხის ნატურალური ფაქტურა, სამზარეულოში კი — ნათელი ტონები. ჭერზე, უმეტესად, მინიმალისტური განათებები გამოვიყენეთ. მათ შორისაა ჩვენთვის გამორჩეული ჭაღი სასტუმრო ოთახში, რომლის სადა, მაგრამ საინტერესო ფორმა, იდეალურად ერწყმის ბინის საერთო ესთეტიკას. კიდევ ერთი გამორჩეული ელემენტია სამზარეულოს ხასხასა, ტერაკოტას ტონალობის ჭაღი, რომელიც მონოქრომულ სივრცეში სახასიათო კონტრასტს ქმნის.

ბავშვების საძინებლებშიც, საერთო სივრცისთვის სახასიათო მინიმალიზმი შევინარჩუნეთ, თუმცა, განსხვავებული დეტალებიც დავამატეთ — ხალისიანი ფერები და ფუმფულა საწოლები. ბიჭის ოთახში ნაზი მწვანე ტონალობა გამოვიყენეთ, გოგოს საძინებელში – ლიმონისფრისა და ვარდისფრის სასიამოვნო კომბინაცია. ბავშვების კომფორტისთვის კი, მათ ოთახებში, გასართობი და სამეცადინო კუთხეებიც მოვაწყვეთ.

მთავარი საძინებელის გარდერობი დაბურული შუშის სლაიდებში ჩავსვით. შედეგად, ოთახში სივრცე მაქსიმალურად შევინარჩუნეთ და ამავდროულად, საკმაოდ ტევადი საგარდერობე ოთახი მივიღეთ.
სივრცის ფუნქციონალური გეგმარება."