კომფორტი ფუნდამენტურია, მისი შექმნის საფუძველი კი განტვირთვა და პრაქტიკულობაა. პროექტი LINEAR სწორედ ამ პრინციპებს ეფუძნება და მინიმალიზმს სამ ძირითად ელემენტზე აგებს: სუფთა ხაზები, მინიმალური დეკორი და სადა ფერთა პალიტრა.

ინტერიერში ყველა ზედაპირი გლუვია, მასალები კი - ნაზი და ერთგვაროვანი, რაც გარემოს მეტ ჰაეროვნებას სძენს. კედლებში ინტეგრირებული ალუმინის განათებები ამ სიმსუბუქეს დინამიკურ ხასიათს მატებს.

მცირე ფართობი ჩვენთვის დაბრკოლება კი არა, სივრცის რაციონალურად ათვისების შესაძლებლობა გახდა. სასადილო ზონასა და სამზარეულოს შორის განთავსებულმა კომპაქტურმა კუნძულმა ერთდროულად ტიხრისა და ტევადი სათავსოს ფუნქცია შეითავსა. ღია და მუქი კაკაოსფერი ტონების მონაცვლეობა, სწორხაზოვან ფორმებთან ერთად, ქმნის საინტერესო ვიზუალურ კონცეფციას სივრცის გადატვირთვის გარეშე.

სრულყოფილების აღქმისთვის აუცილებელი კონტრასტი ინტერიერში მწვანე აქცენტებით შემოვიტანეთ. მცენარეებსა და მწვანე დივანს გონება ბუნებასთან და სიმშვიდესთან მიჰყავს, რაც გარემოში განსაკუთრებულ ჰარმონიას ამკვიდრებს.

პროექტი LINEAR მაცხოვრებლის საჭიროებებს დახვეწილ და პრაქტიკულ ფორმებში აქცევს - ეს არის სივრცე, სადაც დატვირთული დღის შემდეგ სიმსუბუქეს იგრძნობთ.